«МузАРТ» тобы 2001 жылдың сәуiр айында құрылды. «МузАРТ» - көне түркi тiлiнен шыққан, қазақ тiлiне аударғанда «ҰЗ» – сал, серi, т.с.с. жiгiтке тән қасиеттер, ал «АРТ» - биiк, шың, тау деген мағынаны бiлдiредi.
Алғашқы жылдары топтың құрамындағы әншiлер Мейрамбек Бесбаев, Сакен Майғазиев және Мақсат Базарбаев болды.  Мақсат Базарбевтың топтың құрамынан кетуiне байланысты 2005 жылы «МузАРТ» тобының құрамы Жанәбiлов Кенжебектiң келуiмен өзгердi.
Қазiргi кезде Қазақстанда көптеген эстрадалық топтар бар. Сол топтардың iшiнен «МузАРТ» тобы өнер әлемiнде өз орнын тауып,  халықтың үлкен қошеметiне бөленiп, көпшiлiктiң көзайымына айналды. Топтың репертуарында эстрадалық және халық әндерi бар, әсiресе ретро әндер басымдырақ. Әндердiң барлығын ана тiлiмiзде ұлттық нақышпен орындайды.
Елiмiзде бұл топтың әндерiн сүйiп тыңдайды, олар халықтың және ұйымдастырушылардың сұранысы бойынша әр түрлi концерттерге, конкурстарға шақырылады. Қазақстан Республикасының Президентi Нұрсұлтан Әбiшұлы Назарбаев өзiнiң жазған «Үш қоңыр» әнiн орындауды «МузАРТ» тобының жiгiттерiне тапсырды.
2001 жылы М.Бесбаев өнер сахнасында алғашқы есеп беру концертiн өткiздi.
2003 жылы 16-17 желтоқсан күндерi «МузАРТ» тобының «Өз елiм» атты жеке концертi өттi.
2003 жылы «Әттең-ай» деген атпен ән жинағы жарық көрдi.
2003-2004 жылдары Қытай Халық Республикасына және Ресейге ән сапармен барып қайтты.
2006 жылы Түркияда жеке концерт бердi.
2007 жылы «Есiңе ал» ән жинағы жарық көрдi.
2007 жылы «МузАРТ» тобының құрамына жанды дауыста ән шырқау мақсатында шынайы аспаптар сүйемелдейтiн музыканттар алынып, вокалдық-инструменталдық ансамбльге кеңейтiлдi.
2008 жылдың мамыр айында «МузАРТ» ансамблiнiң есеп беру концертi өткiзiлдi. Екi күнге жоспарлаған «МузАРТ» ансамблi тыңдармандардың сұранысы бойынша концерттерiн қатарынан үш күн жоғары дәрежеде өткiздi. Жiгiттер өнерлерiн тек жанды дауыста көрсеттi. Осы есеп беру концертiнен кейiн жiгiттер Оңтүстiк және Шығыс Қазақстанның 8 қалаларына ән сапармен барып қайтты. Концерттерiн ел ыстық ықыласпен қабылдады.
2008 жылы 3 желтоқсанда «МузАРТ» ансамблiнiң сүйемелдеуiмен М.Бесбаев пен ұстазы А.Қоразбаевтың жеке концертi болды.
2008 жылы желтоқсанның 7-сi мен 9-ында Астана қаласында «МузАРТ» ансамблiнiң сүйемелдеуiмен М.Бесбаев пен ұстазы А.Қоразбаев жеке концерт бердi.
2008 жылдың желтоқсан айының 14-желтоқсанында Қазақстанның тәуелсiздiк күнi қарсаңында «МузАРТ» ансамблi Санкт-Петербургте өзiнiң жеке концертiн берiп қайтты.
«МузАРТ» ансамблiне Англия, Ресей, Монғолия, Қытай секiлдi әртүрлi шет елдерге жеке концерт беру туралы ұсыныстар болып жатыр.
Қазiр «МузАРТ» ансамблi өзiнiң келесi жеке альбомын жазуда.
 
Жетiстiктерi:
«ҚР жастар шығармашылығын дамытуға үлес қосқаны үшiн» мақтау қағазы;
«Ұлттық үздiк әншi жүлдесi» жобасының 10 үздiгiнiң қатарына енгенi үшiн Алтын самұрық жүлдесi;
Қазақ радиосының «Ән таңдайық» бағдарламасында айдың үздiк орындаушысы деп танылған дипломы;
«Ән мен әншi» бағдарламасындағы жемiстi шығармашылық еңбегi үшiн марапатталған дипломы;
«МузАРТ» тобы – топ әншiлерi: – Бесбаев Мейрамбек Әбiләшiмұлы, Майғазиев Сәкен Қордабайұлы, Жанәбiлов Кенжебек Тұрсынбайұлы Қазақстан Республикасы Мемлекеттiк “ДАРЫН” жастар  сыйлығының иегерлерi.